ពិធីប្រកាសតែងតាំងចូលកាន់មុខតំណែរជាអភិបាល នៃគណៈអភិបាលស្រុកល្វាឯម ក្រោមអធិបតីភាព ឯកឧត្តម គង់ សោភ័ណ្ឌ
កណ្ដាល ៖ លោក កន សុខកាយ អភិបាលរងស្រុកល្វាឯម ត្រូវបានប្រកាសតែងតាំងជា អភិបាលស្រុកល្វាឯម ជំនួសលោក ភឹម ភីរ៉ា ដែលត្រូវផ្លាស់ប្ដូរទៅកាន់មុខតំណែងជាអភិបាលរងខេត្តក្រចេះ ការប្រកាសតែងតាំងនេះធ្វើឡើង កាលពីរសៀលថ្ងៃទី១១ ខែមីនា ឆ្នាំ២០២០ នៅរដ្ឋបាលស្រុកល្វាឯម ក្រោមអធិបតីភាព ឯកឧត្តមគង់ សោភ័ណ្ឌ អភិបាលនៃគណៈអភិបាលខេត្តកណ្ដាល និងលោក អ៊ុំ សីហា អនុប្រធានទី២ ក្រុមការងារថ្នាក់ជាតិ ចុះជួយមូលដ្ឋានស្រុកល្វាឯម ។
ថ្លែងក្នុងពិធីនេះ ឯកឧត្តម គង់ សោភ័ណ្ឌ អភិបាលខេត្តកណ្ដាលបាន ជំរុញដល់អភិបាលស្រុកថ្មីត្រូវមានភាពស្មោះត្រង់ជាមួយមន្ត្រីក្រោមឱវាទ និងថ្នាក់លើជាពិសេសជាមួយរាជរដ្ឋាភិបាល បន្ថែមពីនេះអភិបាលស្រុកថ្មីត្រូវស្វែងយល់អំពីច្បាប់នានា ត្រូវរៀនសូត្រពីការងារជាក់ស្ដែង រៀនសូត្រពីចាស់ទុំដើម្បីធ្វើឲ្យការងារទទួលបានជោគជ័យកាន់តែប្រសើឡើង។
ឯកឧត្តម គង់ សោភ័ណ្ឌ អភិបាល បានបញ្ជាក់ថា លោក កន សុខកាយ ជាមន្ត្រីមួយរូប ដែលបានប្រឡូកក្នុងការងារនាជាច្រើននៅមូលដ្ឋាន ហើយទទួលបាននូវបទពិសោធន៍លើការងារដឹកនាំ និងការងារគ្រប់គ្រងជាច្រើន ដោយកន្លងមកលោកធ្លាប់បម្រើការងារជាស្មៀនឃុំពាមឧកញ៉ាអុង, ជាប្រធានការិយាល័យរដ្ឋបាល និងហិរញ្ញវត្ថុសាលាស្រុក, ជានាយករងរដ្ឋបាលសាលាស្រុក និងជាអភិបាលរងស្រុកល្វាឯម(តាំងពីឆ្នាំ២០១៦)។
ឯកឧត្តម គង់ សោភ័ណ្ឌ បានបន្តថា ជាងនេះទៅទៀត លោក កន សុខកាយ ធ្លាប់ទទួលការបណ្តុះបណ្តាលថ្នាក់បរិញ្ញាបត្រ និងបរិញ្ញាបត្រជាន់ខ្ពស់ ផ្នែកនីតិសាស្ត្រ ហើយក៏ជាសិស្សមន្ត្រីក្រមការ នៅសាលាភូមិន្ទរដ្ឋបាលផងដែរ។ ដោយពិនិត្យទៅលើលក្ខណៈសម្បត្តិ ចំណេះដឹង បទពិសោធន៍ និងអតីតភាពការងារកន្លងមក ទើប រដ្ឋបាលខេត្ត បានលើកសំណើទៅក្រសួងមហាផ្ទៃ និង រាជរដ្ឋាភិបាល ដើម្បីស្នើសុំតែងតាំងលោក កន សុខកាយ ជាអភិបាល នៃគណៈអភិបាលស្រុកល្វាឯម។
ដើម្បីធ្វើឲ្យស្រុកល្វាឯម មានសណ្តាប់ធ្នាប់សង្គម រក្សាបាននូវសន្តិសុខល្អជូនប្រជាពលរដ្ឋ មានការអភិវឌ្ឍរីកចម្រើនលើគ្រប់វិស័យជាបន្តបន្ទាប់ទៀត ឯកឧត្តមអភិបាលខេត្ត ក៍បានលើកទឹកចិត្ត និងជំរុញដល់ក្រុមប្រឹក្សាស្រុក អភិបាលរងស្រុក មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋទាំងអស់ ក្នុងស្រុកល្វាឯម សូមផ្តល់ការគាំទ្រ និងរួមសហការជាមួយ អភិបាលស្រុកល្វាឯមថ្មីឲ្យអស់ពីកម្លាំងកាយចិត្ត សំដៅធ្វើឲ្យស្រុកល្វាឯម អាចសម្រេចបាននូវសមិទ្ធផលធំៗជាច្រើនបន្ថែមទៀតជូនប្រជាពលរដ្ឋ។
