ពិធីបំពាក់ឯកសណ្ឋានជូនដល់យុវជនកាកបាទក្រហមកម្ពុជាចំនួន ៥៤៤នាក់
ខេត្តកំពត ៖ នៅសៀល ថ្ងៃសុក្រ ១២រោច ខែបុស្ស ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០១ ខែកុម្ភៈ ឆ្នាំ២០១៩ នេះ លោក ជាវ តាយ ប្រធានកិត្តិយសសាខាកាកបាទក្រហមកម្ពុជាខេត្តកំពត និងលោកស្រី លាង ហៃ ជាវតាយ អនុប្រធានកិត្តិយសសាខា បានអញ្ជើញជាអធិបតីភាពក្នុងពិធីបំពាក់ឯកសណ្ឋានជូនដល់យុវជនកាកបាទក្រហមកម្ពុជាចំនួន ៥៤៤នាក់។
ក្នុងពិធីនោះក៏មានការចូលរួមពីសំណាក់ លោក លោកស្រី ជាអភិបាលរងខេត្ត នាយករដ្ឋបាលសាលាខេត្ត នាយកទីចាត់ការ ប្រធានអង្គភាពចំណុះសាលាខេត្ត សមាជិកគណៈកម្មាធិការ គណៈកិត្តិយស គណៈកម្មាធិការអនុសាខា ប្រធានមន្ទីរ អង្គភាពជុំវិញខេត្ត ក្រុមប្រតិបត្តិ គ្រូទីប្រឹក្សាយុវជនកាកបាទក្រហមកម្ពុជា និងយុវជនកាកបាទក្រហម សរុប ៦៤០ នាក់។
ក្នុងឱកាសនោះ លោកជាវ តាយ ក៏បានផ្តែផ្តាំ ក្រើនរម្លឹកដល់ក្រុមយុវជន យុវនារីទាំងអស់ត្រូវចេះស្តាប់បង្គាប់ឪពុក ម្តាយ ចេះថែរក្សាសុខភាពខ្លួនឯងឱ្យបានល្អ ចេះស្រលាញ់គ្នាដូចបងប្អូនរួមផ្ទៃម្តាយតែមួយ ចេះជួយយកអាសារគ្នាទៅវិញទៅមក ហើយក៏ត្រូវចេះឆ្លុះបញ្ចាំងអ្វីដែលកើតឡើងក្នុងសង្គមបច្ចុប្បន្នផងដែរ ពិសេសត្រូវជៀសឱ្យឆ្ងាយពីគ្រឿងញៀន។
ជាមួយគ្នានេះ លោក ជាវ តាយ ប្រធានកិតិ្តយស ក៏បានផ្តល់ប្រាក់ឧបត្ថម្ភ សរុបចំនួន ៥.៩២០.០០០៛ រួមមាន៖
១.ឧបត្ថម្ភជូនទីប្រឹក្សាយុវជនកាកបាទក្រហម ១២ នាក់ ក្នុុងម្នាក់ៗ ទទួលបាន ៤០.០០០រៀល។
២.ឧបត្ថម្ភយុវជនកាកបាទក្រហម ៥៤៤ នាក់ ក្នុងម្នាក់ៗ ទទួលបាន ១០.០០០រៀល៕
