(គេហទំព័រ ពន្លឺខ្មែរអមតៈ)បង្ក្រាបក្រុមឧក្រិដ្ឋជនគ្រឿងញៀន ៣នាក់ ជាជនជាតិចិន (តៃវ៉ាន់) រឹបអូសគ្រឿងញៀន ជាង ១០០គីឡូក្រាម

ចេញផ្សាយថ្ងៃសុក្រ ទី២៥ ខែមិនា ឆ្នាំ២០២២
ការិយាល័យនិពន្ធ 017778289=0882476167

(ភ្នំពេញ)៖ សមត្ថកិច្ចជំនាញនៃមន្ទីរប្រឆាំងគ្រឿងញៀន បានបង្ក្រាបក្រុមឧក្រិដ្ឋជនគ្រឿងញៀន ចំនួន ៣នាក់ ជាជនជាតិចិន (តៃវ៉ាន់) ដោយរឹបអូសគ្រឿងញៀន បានជាង ១០០ គីឡូក្រាម។ នេះបើតាមរបាយការណ៍របស់សមត្ថកិច្ច ដែលបណ្តាញព័ត៌មាន Fresh News ទទួលបាននៅថ្ងៃទី២៥ ខែមីនា ឆ្នាំ២០២២។

ប្រតិបត្តិការនេះធ្វើឡើងដោយអនុវត្តតាមបញ្ជានាយឧត្ដមសេនិយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និង នាយឧត្ដមសេនិយ៍ ម៉ក់ ជីតូ អគ្គស្នងការរងទទួលផែនប្រឆាំងបទល្មើសគ្រឿងញៀន ក្រោមការបញ្ជាដឹកនាំផ្ទាល់ របស់ឧត្ដមសេនីយ៍ឯក ឡឹក វណ្ណៈ នាយកមន្ទីរប្រឆាំងគ្រឿងញៀន ។

របាយការណ៍ដដែលបន្តថា កាលពីថ្ងៃទី២២ ខែមីនា ឆ្នាំ២០២២ វេលាម៉ោង ២០៖១៥នាទី សមត្ថកិច្ចជំនាញនៃមន្ទីរប្រឆាំងបទល្មើសគ្រឿងញៀន(ក៩) ដឹកនាំដោយលោក ឧត្តមសេនីយ៍ត្រី យិន បញ្ញារិទ្ធ នាយករងមន្ទី លោក វរសេនីយ៍ឯក ដុសវណ្ណា សុវឌ្ឍនៈ នាយករងមន្ទីរ និងលោក វរសេនីយ៍ទោ ឌុក មករា នាយការិយាល័យ ចូលរួមសហការកម្លាំងជំនាញនៃស្នងការដ្ឋាននគរបាលរាជធានីភ្នំពេញ សម្របសម្រួលដោយ លោក ស៉ិត វណ្ណៈ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ចុះស្រាវជ្រាវ និងឈានទៅបង្ក្រាបដឹកជញ្ជូន រក្សាទុកសារធាតុញៀននៅ ៣ចំណុចផ្សេងគ្នាជាបន្តបន្ទាប់។

ចំណុចទាំងនោះ គឺរួមមាន៖

* ទី១៖ នៅចំណុច បណ្តោយផ្លូវជាតិ លេខ៤ បង្គោលគីឡូម៉ែតលេខ២៣ ទល់មុខរោងចក្រCPF ឃុំបែកចាន ស្រុកអង្គស្នួល ខេត្តកណ្តាល
* ទី២៖ នៅចំណុច ផ្ទះលេខ២០ ផ្លូវលេខ១១ បុរីពិភពថ្មី សង្កាត់ភ្នំពេញថ្មី ខណ្ឌសែនសុខ
* ទី៣៖ នៅចំណុចផ្ទះគ្មានលេខ(ជាប់ផ្ទះលេខ១A២)ផ្លូវលំលេខ៥៩៨ ភូមិទំនប់ សង្កាត់ភ្នំពេញថ្មី ខណ្ឌសែនសុខ។

សមត្ថកិច្ច បានឃាត់ខ្លួនជនសង្ស័យ ៣នាក់ រួមមាន៖

១៖ ឈ្មោះ LI YANG ភេទប្រុស ជនជាតិចិន(តៃវ៉ាន់) កើត១៩៨៨ លិខិតឆ្លងដែន(គ្មាន)
២៖ ឈ្មោះ JEN HAO JUN ភេទប្រុស ជនជាតិចិន(តៃវ៉ាន់)កើត១៩៨៤ ឆ្លងដែន 360271474
៣៖ ឈ្មោះ CHEN POYEN ភេទប្រុស ជនជាតិចិន(តៃវ៉ាន់)កើត១៩៩៣ ឆ្លងដែន 307520541

សមត្ថកិច្ចក៏បានចាប់យកវត្ថុតាង រួមមាន៖

១៖ កេតាមីន(Ketamine) ទម្ងន់ ៩៩គីឡូក្រាម ៦០២,០៣ ក្រាម
២៖ អ៉ិចស្តាស៉ី(MDMA) ទម្ងន់ ៧គីឡូក្រាម ៣៧៩ ក្រាម
៣៖ មេតំហ្វេតាមីន(WY) ទម្ងន់ ១៩០ ក្រាម
៤៖ នីមេតាហ្សេប៉ាម(Nimetazepam) ទម្ងន់ ៧,២ ក្រាម
* សារធាតុញៀនសរុប ទម្ងន់ ១០៧ គីឡូក្រាម ១៧៨,២៣ក្រាម។

បច្ចុប្បន្នជនសង្ស័យ ព្រមទាំងវត្ថុតាងចាប់យកខាងលើ បានកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការបន្តតាមនីតិវិធី៕