លោក កែន សត្ថា អភិបាលខេត្តកែប លើកឡើងថា វិស័យកីឡាជាវិស័យអាទិភាពមួយ ដែលរាជរដ្ឋាភិបាលកំពុងផ្តោតការយកចិត្តទុកដាក់
(ខេត្តកែប)៖ លោក កែន សត្ថា អភិបាល នៃគណៈអភិបាលខេត្តកែប បានជំរុញដល់យុវជន សិស្សានុសិស្សត្រូវបន្តខិតខំហាត់កីឡាគ្រប់ប្រភេទ ដើម្បីបង្កើនកម្លាំងកាយសម្បទាឲ្យបានកាន់តែរឹងមាំ ព្រោះបច្ចុប្បន្នរាជរដ្ឋាភិបាលបាននិងកំពុងផ្តោតការយកចិត្តទុកដាក់ លើផ្នែកវិស័យកីឡា ហើយក៏ចាត់ទុកវិស័យកីឡាជាវិស័យអាទិភាពមួយ ក្នុងចំណោមវិស័យសំខាន់ៗជាច្រើនទៀត។
ការលើកឡើងបែបនេះ ក្នុងខណៈពេល លោក កែន សត្ថា ចូលរួមធ្វើជាគណៈអធិបតី អបអរសាទរពិធីប្រកួតបាល់ទាត់ពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី១៣ ឆ្នាំ២០១៩ កាលពីរសៀលថ្ងៃអង្គារ ៤រោច ខែចេត្រ ឆ្នាំកុរ ឯកស័ក ព.ស ២៦៥២ ត្រូវនឹងថ្ងៃទី២៣ ខែមេសា ឆ្នាំ២០១៩ រវាងក្រុមបាលទាប់ជម្រើសខេត្តកែប ជួបជាមួយក្រុមបាល់ទាត់ជម្រើសខេត្តបន្ទាយមានជ័យ។
លោក កែន សត្ថា អភិបាលខេត្តកែប បានបញ្ជាក់ទៀតថា ការលេងកីឡាពិតជាផ្តល់ប្រយោជន៍យ៉ាងច្រើនដល់សុខភាព ពិសេសយើងអាចជៀសឆ្ងាយពីគ្រឿងញៀន។ដូច្នេះលោកសូមផ្តាំផ្ញើដល់ក្រុមយុវជន យុវនារី សិស្សានុសិស្សទាំងអស់ បើទំនេរពីការរនសូត្រ គួរតែនាំគ្នាហាត់កីឡា លេងកីឡាឲ្យបានផុលផុស ដើម្បីពង្រឹងអាវៈយវៈឲ្យបានកាន់តែរឹងមាំ និងមានសុខភាពមាំមួន។
សូមជម្រាបថា៖ ក្នុងពិធីប្រកួតបាល់ទាត់ពានរង្វាន់សម្តេចតេជោ ហ៊ុន សែន នេះក៏មានការចូលរួមអមដំណើរដោយ លោក សោម ពិសិដ្ឋ អភិបាលរងខេត្ត លោកប្រធាន អនុប្រធានមន្ទីរ អង្គភាព ជុំវិញខេត្ត គណៈអភិបាលក្រុង ស្រុក កងកម្លាំងប្រដាប់អាវុធទាំងបីអង្កភាព លោកគ្រូ អ្នកគ្រូ សិស្សានុសិស្ស សរុប ៥១០នាក់។
ហើយលទ្ធផលនៃការប្រកួត ខេត្តកែប ឈ្នះខេត្តបន្ទាយមានជ័យ (កែប៤ ,បន្ទាយមានជ័យ៣)។ ក្នុងពេលបិទការប្រកួត លោក កែន សត្ថា អភិបាលខេត្តកែប បានលើកទឹកចិត្ដដល់កីឡាករគឺឧបត្ថម្ភជាថវិកាចំនួន ២.០០០.០០០៛ លោក ម៉ម ទូច ប្រធានមន្ទីរសាធារណការ និងដឹកជញ្ជូនខេត្តកែប ឧបត្ថម្ភថវិកាចំនួន ៤០០.០០០៛ លោកលឹម ឆៃវរ៉ាត់ ៤០០០០០៛ លោកវណ្ណ ចាន់វុទ្ធី ប្រធានមិត្តហ្វូន ៤០០.០០០៛ លោកប៊ុន យោង១០០.០០០៛ សរុប ៣.៣០០.០០០ រៀល៕
