អ្នកទន្ទ្រាន និងអ្នកកាងបឹងធម្មជាតិរបស់រដ្ឋ ល្មមដល់ពេលវែកមុខហើយ
(ខេត្តកំពត)៖ មានប្រភពច្បាស់ការបាននាំគ្នាខ្សឹបខ្សៀវថា ទាំងអ្នកទន្ទ្រាន និងអ្នកកាងពីក្រោយការរំលោភយកបឹងធម្មជាតិរបស់រដ្ឋ ស្ថិតក្នុងភូមិបឹងធំខាងលិច ឃុំអង្គសុរភី ស្រុកកំពង់ត្រាច ខេត្តកំពត ល្មមដល់ពេលវែកមុខហើយ ព្រោះគេដឹងច្បាស់ថា បុគ្គលមួយគ្រួសារដែលហ៊ានទន្ទ្រានដីបឹងឈូករបស់រដ្ឋមិនខ្លាចក្រែងដល់អាជ្ញាធរបែបនេះ ពិតជាមានមន្ត្រីអន្ទ្រើសៗដែលបានលិឍសើមមាត់កំពុងរុញច្រាននៅពីក្រោយ ដើម្បីចែកលាភសក្ការៈ។
ប្រភពបានបង្ហើបទៀតថា ឥឡូវនេះប្រជាពលរដ្ឋរាប់រយនាក់កំពុងមានប្រតិកម្មយ៉ាងពុះកញ្ជ្រោល ខណៈបុគ្គលមួយគ្រួសារ ប្តីឈ្មោះ សំ អេន ប្រពន្ធឈ្មោះ សេង យិ ជួលត្រាក់ទ័រភ្ជួររាស់បឹងឈូករបស់រដ្ឋដោយគ្មានខ្លាចច្បាប់ហើយជេរប្រមាថអាជ្ញាធរនិងសមត្ថកិច្ចដោយគ្មានញញើតមាត់ និងមានចេតនាចង់ក្រសោបយកបឹងធម្មជាតិដោយគ្មានញញើតនឹងច្បាប់បែបនេះ។
គេចង់ដឹងណាស់ ប្រជាពលរដ្ឋមួយគ្រួសារនេះគាត់សំអាងទៅលើអ្វីទើបហ៊ានទន្ទ្រានយកដីបឹងរបស់រដ្ឋគ្មានខ្មាស់អៀនអីបន្តិចសោះ។
បើតាមព័ត៌មានបែកធ្លាយលួចបង្ហើបថា លោកតា សំ អេន មានគេបញ្ជានៅពីក្រោយ ដើម្បីទន្ទ្រានយកបឹងឈូករបស់រដ្ឋសម្រាប់វាស់ចែកគ្នា ព្រោះគេបានប៉ាន់ប្រមាណរួចហើយ បឹងដែលជាជ្រលងបង្ហូរទឹកដែលគេកំពុងលេបទឹកមាត់ចង់បាននេះមានតម្លៃក្បែរលានដុល្លារឯណោះ។
គេដឹងទៀតថា បឹងធម្មជាតិដែលគេកំពុងប្រើគ្រប់រូបភាពដើម្បីសុំគោលការណ៍ធ្វើប្លង់នេះ មានក្បាលដី៩៤ម៉ែត្រ×៣០០ម៉ែត្រ ជាប់នឹងដងផ្លូវជាតិលេខ៣១ ជាដីបឹងធំល្វឹងល្វើយ បើដីត្រូវប៉ាន់បែបនេះអ្នកណាក៏លេបទឹកមាត់ចង់បានដែរ..!!
គេដឹងទៀតថា បើទន្ទ្រានយកបានសម្រេចមែន លោកតា សំ អេន បានយ៉ាងច្រើនត្រឹម៣០%ប៉ុណ្ណោះ សល់ពីនោះគេយកអស់ហើយ ម្តេចក៏ខំប្រវេប្រវាម្លេះ..ដល់ពេលជាប់ទោសជាប់តែម្នាក់ឯងហ្នឹង….!!!!
សូមជម្រាបថា៖ បឹងធម្មជាតិស្ថិតក្នុងភូមិបឹងធំខាងលិច ឃុំអង្គសុរភី ស្រុកកំពង់ត្រាច ខេត្តកំពត ដែលគេកំពុងឃុបឃិតចង់ក្រសោបយកធ្វើជាសម្បតិ្តឯកជននោះ គឺជាជ្រលងបណ្តោះទឹក ដែលប្រជាពលរដ្ឋជាង២០០គ្រួសារស្ថិតក្នុងឃុំបឹងសាលាខាងជើង និងឃុំកំពង់ត្រាចខាងកើត កំពុងជំទាស់តវ៉ា មិនឲ្យរដ្ឋបាលស្រុកកំពង់ត្រាច ចេញប័ណ្ណកម្មសិទ្ធិជូនបុគ្គលមួយគ្រួសារនោះឡើយ។ ដូច្នេះប្រសិនបើជំនាញហ៊ានចេញប្លង់ជូនទៅតាមការស្នើសុំមែននោះ ពួកគាត់ក៏នាំគ្នាបោះបង្គោលយកបឹងធម្មជាតិនេះ ហើយសុំធ្វើប័ណ្ណកម្មសិទ្ធិបានដូចគ្នា….។
ចំពោះព័ត៌ច្បាស់ការណ៍ចុងក្រោយ ត្រូវបានទម្លាយថា ពេលនេះអាជ្ញាធរស្រុកកំពង់ត្រាចបានដាក់ពាក្យបណ្តឹងប្តឹងទៅសាលាដំបូងខេត្តកំពតឲ្យចាត់ការដល់អ្នកទន្ទ្រានបឹងធម្មជាតិនេះហើយ ហើយគេចឹងដឹងថា បើរកមុខអ្នកទន្ទ្រានឃើញច្បាស់ចែសដូចថ្ងៃទៅហើយនោះ តើអាចវែកមុខអ្នករុញនៅពីក្រោយឃើញដែរទេ?៕
