រដ្ឋបាលខេត្តកែប បានរៀបចំបុណ្យវិសាខបូជានៅវត្តសត្ថាធម្មវិហារ(ភ្នំពោន)
(ខេត្តកែប)៖ លោក កែន សត្ថា អភិបាល នៃគណអភិបាលខេត្តកែប បានមានប្រសាសន៍ថា ថ្ងៃ១៥ កើត ខែវិសាខ គឺជាទិវាប្រវត្តិសាស្ត្រដ៏សំខាន់មួយ ដែលពុទ្ធសាសនិកជនគ្រប់រូប ទូទាំងពិភពលោក ប្រារព្ធពិធីរម្លឹកជារៀងរាល់ឆ្នាំ តាមរយៈកម្មវិធីបុណ្យប្រពៃណីព្រះពុទ្ធសាសនា គឺ វិសាខបូជានេះ។
វិសាខបូជា ដែលប្រារព្ធឡើងថ្ងៃទី១៨ ខែឧសភា ឆ្នាំ២០១៩ នៅវត្តសត្ថាធម្មវិហា (ភ្នំពោន)នេះ ដើម្បីរំឭកដល់ថ្ងៃខួបកំណើត(ខួបទី២៦៤២) ខួបថ្ងៃត្រាស់ដឹង(ខួបទី២៦០៧) និងខួបថ្ងៃចូល បរិនិព្វាន(២៥៦២) របស់ព្រះសមណគោត្តម ដែលជាព្រះអរហន្តសម្មាសម្ពុទ្ធបរមគ្រូនៃយើង។ អភិលក្ខិតសម័យទាំងបីនេះ កើតឡើងនៅចំថ្ងៃ១៥កើត ខែពិសាខតែមួយខុសគ្នាតែឆ្នាំប៉ុណ្ណោះ។
ម្យ៉ាងទៀតអង្គការសហប្រជាជាតិបានកំណត់យកវិសាខបូជា ជាទិវាអន្តរជាតិ ចាប់តាំងពីថ្ងៃ១៥ ខែធ្នូ ឆ្នាំ១៩៩៩ មកម្ល៉េះ ដែលជាការទទួលស្គាល់ជាសាកលអំពីការរួមចំណែក របស់ព្រះពុទ្ធសាសនាក្នុង ពិភពលោកជាងពីរពាន់ប្រាំរយឆ្នាំមកនេះហើយនិងកំពុងបន្តនូវ ឥទ្ធិពលរបស់ខ្លួនក្នុងការលើកស្ទួយចិត្តវិញ្ញាណរបស់មនុស្សជាតិតទៅទៀត។
ស្របពេលថ្ងៃនេះផងដែរ ក្នុងឱកាសដ៏ថ្លៃថ្លានេះ រដ្ឋបាលខេត្តក៏បានរៀបចំបុណ្យវិសាខបូជា នៅវត្តសត្ថាធម្មវិហារ ព្រមទាំងពុទ្ធាភិសេកព្រះពុទ្ធរូបនៅវត្តសត្ថាធម្មវិហារចំនួន១៥៧អង្គ ស្ថិតនៅភ្នំពោន ភូមិភ្នំលាវ ឃុំពងទឹក ស្រុកដំណាក់ចង្អើរ ខេត្តកែប ផងដែរ។
បងប្អូនប្រជាពលរដ្ឋ មន្ត្រីរាជការ ថ្នាក់ដឹកនាំខេត្ត ក្រុង ស្រុក ឃុំ សង្កាត់ក្នុង និងក្រៅខេត្តកែប ជាច្រើនរូប បានចូលរួមក្នុងការប្រារព្ធពិធី មានការដើរហែប្រទក្សិណជុំវិញព្រះវិហារ ការថ្វាយភ្ញីផ្កា ការសូត្រធម៌រំឭកសរសើរ ការស្តាប់ ធម្មទេសនា និងការសាកសួរសាកច្ឆាធម៌ជាដើម។
កិច្ចការទាំងនេះ ជាការប្រសើរណាស់ ព្រោះបាននូវអានិសង្ស ដែលកើតមកពីការធ្វើទាន រក្សាសីល តែជាពិសេសទៅទៀតនោះ គឺការដែលប្រជាពុទ្ធបរិស័ទ គប្បីយល់ឱ្យកាន់តែបានច្បាស់ថែមទៀតអំពី សារសំខាន់របស់ថ្ងៃទាំងបីនេះ ដើម្បីជាប្រយោជន៍សម្រាប់យកមកប្រតិបត្តិ និងអនុវត្តក្នុងជីវិតប្រចាំថ្ងៃរបស់ខ្លួន៕
