បញ្ហាកង្វះអាហារូបត្ថម្ភនិងជាតិដែក គឺជាបញ្ហាចំបងមួយនៅក្នុងងចំណោមបញ្ហា ចំបងបីផ្សេងទៀត
(ខេត្តកំពត)៖ បញ្ហាកង្វះអាហារូបត្ថម្ភនិងជាតិដែក គឺជាបញ្ហាចំបងមួយនៅក្នុងងចំណោមបញ្ហាចំបងបីផ្សេងទៀតរួមមានគឺបញ្ហាកង្វះប្រូទេអ៉ីននិងថាមពល កង្វះជីវជាតិអា និងកង្វះជាតិអ៉ីយ៉ូដ ជាដើម។
ពាក្យពេចន៍ទាំងនេះគឺជាការលើក របស់ លោក សុខ សុយ៉ុន អនុរដ្ឋលេខាធិការក្រសួងផែនការនៅក្នុងឱកាសបើកអង្គសិក្ខាសាលាផ្សព្វផ្សាយនៃការអនុវត្តខ្លឹមសារប្រកាសលេខ០៤៨កជអជ ស្ដីពីការផលិត ការប្រើប្រាស់និងសារៈសំខាន់នៃប្រើប្រាស់ទឹកត្រី ទឹកស៉ីអ៉ីវមានជាតិដែកនៅខេត្តកំពតកាលពីព្រឹកថ្ងៃទី២៨ខែឧសភា ឆ្នាំ២០១៩។
លោក សុខ សុយ៉ុន បានបន្តឲ្យដឹងទៀតថា បញ្ហាកង្វះជាតិដែកនេះហើយដែលបណ្ដាលឲ្យមានភាពស្លេកស្លាំងនិងការវិវត្តន៍ផ្នែករាងកាយ និងការលូតលាស់ខាងប្រាជ្ញាស្មារតីរបស់កុមារ មានភាពយឺតយ៉ាវ ហើយប្រសិនបើការកង្វះជាតិដែកនេះកើតឡើងចំពោះនារីកំពុងមានផ្ទៃពោះនោះ វានឹងអាចបណ្ដាលឲ្យមានបញ្ហាដល់ទារកក្នុងផ្ទៃ ឬ ទារកកើតមកមិនគ្រប់ទម្ងន់ ហើយវានឹងឈានទៅដល់ការខ្វះលទ្ធភាពចូលរួមចំណែកក្នុងការកសាងសេដ្ឋកិច្ចសង្គមក៏ដូចជាធនធានមនុស្សដែលជាសក្ដានុពលលើកកម្ពស់ផ្នែកសេដ្ឋកិច្ចរបស់ជាតិទៀតផងដែរ។
លោក សុខ សុយ៉ុន បានបន្តទៀតថា ដោយបានយល់ច្បាស់អំពីគ្រោះថ្នាក់ខាងលើនេះហើយ រាជរដ្ឋាភិបាល ក៏បានដាក់ឲ្យអនុវត្តនូវកម្មវិធីកាត់បន្ថយភាពស្លេកស្លាំង តាមរយៈ ការបញ្ចូលជាតិដែកក្នុងទឹកត្រី ទឹកស៉ីអ៉ីវចាប់ពីឆ្នាំ២០០៥មកម្ល៉េះ ហើយភាពស្លេកស្លាំងដែលបណ្ដាលមកពីិង្វះជាតិដែកនេះនៅតែជាបញ្ហាចំបងចំពោះសុខភាពសាធារណៈក្នុងព្រះរាជាណាចក្រកម្ពុជាយើង។
លោក សុខ សុយ៉ុន ក៏បានឲ្យដឹងផងដែរថា កម្មវិធីកាត់បន្ថយភាពស្លេកស្លាំងនេះបានឆ្លងកាត់ឧបសគ្គជាច្រើនដែលមានអង្គការដៃគូពាក់ព័ន្ធនានាបានសហការជាមួយក្រសួងផែនការដែលជាហេតុធ្វើឲ្យកម្មវិធីផលិតទឹកត្រី ទឹកស៉ីអ៉ីវមានជាតិដែកមានការរីកចម្រើននឹងមានចីរភាពទទួលបានលទ្ធផលគួរឲ្យមោទនៈហើយក៏ត្រូវបានកំពុងអនុវត្តន៍នៅទូទាំងព្រះរាជាណាចក្រកម្ពុជានិងអាចមានទឹកត្រី ទឹកស៉ីអ៉ីវមានជាតិដែកលក់ស្ទើរតែគ្រប់ទីផ្សារ សម្រាប់បំពេញតំរូវការរបស់ប្រជាពលរដ្ឋមកទល់បច្ចុប្បន្ននេះផងដែរ។
សូមជម្រាបថា៖ សិក្ខាសាលានេះក៏មានវត្តមានចូលរួមពីលោកស្រី យូ សុគន្ធអភិបាលរងខេត្ត និងមានរយៈពេលមួយព្រឹក រៀបចំឡើងដោយនាយកដ្ឋានលើកកម្ពស់អាហារូបត្ថម្ភនៃក្រសួងផែនការនិង មានអ្នកចូលរួមពីថ្នាក់ដឹកនាំមន្ទីរអង្គភាពនិងមន្ត្រីពាក់ព័ន្ធមួយចំនួនព្រមទាំងអាជ្ញាធរមូលដ្ឋាន និងផលិតករ អាជីវករក្នុងខេត្ត ក្នុងគោលបំណង ពង្រឹងឡើងវិញនូវគោលដៅ និងយុទ្ធសាស្ត្រនៃការអនុវត្តខ្លឹមសារប្រកាសលេខ០៤៨ កជអជ ស្ដីពីការផលិត ការប្រើប្រាស់ ទឹកត្រី ទឹកស៉ីអ៉ីវ មានជាតិដែក ក៏ដូចជាការទប់ស្កាត់ការចរាចរ និងការនាំចូលទឹកត្រី ទឹកស៉ីអ៉ីវគ្មានជាតិដែកមកក្នុងព្រះរាជាណាចក្រកម្ពុជាព្រមទាំងរក្សាឲ្យបាននូវសុវត្ថិភាព នៃកម្មវិធីបញ្ចូលជាតិដែក ក្នុងទឹកត្រី ទឹកស៉ីអ៉ីវ ប្រកបដោយគុណភាពទូទាំងព្រះរាជាណាចក្រកម្ពុជានៅថ្ងៃមុខផងដែរ៕ សេង ណារិទ្ធ
