រថយន្តថៃដឹកទំនិញចេញ-ចូល ឆ្លងខេត្តប៉ៃលិន ហួសការកំណត់ច្បាប់កម្ពុជា ធ្វើឲ្យប្រជាពលរដ្ឋតាមព្រំដែនគ្មានចំណូលប្រចាំថ្ងៃ ស្នើសុំអភិបាលខេត្តជួយអន្តរាគមន៍
ខេត្តប៉ៃលិន៖ មានការលើកឡើងពីប្រជាពលរដ្ឋរស់នៅក្នុងខេត្តប៉ៃលិនថា បច្ចុប្បន្នរថយន្តសណ្តោងរ៉ុម៉ក របស់ប្រទេសថៃ បានបើកបរក្នុងខេត្តប៉ៃលិន និងឆ្លងខេត្តប៉ៃលិន ដើម្បីដឹកទំនិញ ដែលម្ចាស់សៃឡូជនជាតិថៃ ជួលដីប្រជាពលរដ្ឋ ធ្វើអាជីវកម្មទិញកសិផលពីកសិករខ្មែរ ប៉ុន្តែការឆ្លងដែនមកទិញទំនិញ ដោយឆ្លងខេត្តបែបនេះ គឺវាខុសពីការកំណត់ច្បាប់កម្ពុជា ជាហេតុធ្វើប្រជាពលរដ្ឋនៅតាមព្រំដែន ដែលមានរថយន្ត ត្រូវស្តុបទុកចោលគ្មានចំណូលប្រចាំថ្ងៃផងដែរ ។
ពលរដ្ឋម្នាក់ឈ្មោះ ទូច រស់នៅភូមិអូររអិល ឃុំស្ទឹងកាច់ ស្រុកសាលាក្រៅ បានលើកឡើងថា៖ សព្វថ្ងៃរថយន្តថៃ ទាំងសណ្តោងរូម៉ក និងរថយន្តទទេរ តែងតែបើកបរក្នុងល្បឿនលឿង មិនគោរពច្បាប់ស្រុកខ្មែរឡើយ ហើយបើបង្កគ្រោះថ្នាក់ដោយប្រការណាមួយ តែងតែបើករត់គេច ចូលសៃឡូធ្វើមិនដឹង រហូតសមត្ថកិច្ចស្រាវជ្រាវឃើញ យកមកកាន់ស្នងការនគរបាលខេត្ត គ្រាន់តែបង់សំណងរួចខ្លូនបាត់តែម្តង បើប្រជាពលរដ្ឋខ្មែរវិញដឹងតែជាប់គុកច្រវ៉ាក់ហើយ ។ លោក បានបន្តថា៖ពលរដ្ឋ ដែលមានរថយន្តផ្ទាល់ខ្លូនមួយចំនួន គឺត្រូវទុកចោល ដោយសារតែគ្មានអ្វីដឹក ព្រោះរថយន្ត របស់ថៃដឹកអស់ហើយ មានពេលខ្លះរថយន្តប្រទេសថៃឆ្លងព្រំដែន ចូលដល់ចំការពលរដ្ឋខ្មែររាប់រយគឺឡូម៉ែត្រ ដឹកយកទៅប្រទេសថៃតែម្តង ហើយប្រការនេះគឺវាខុសពីច្បាប់កម្ពុជាយើង ដែលឲ្យបរទេសចូលដីខ្មែរត្រឹមតែ២០ទៅ៣០គឺឡូម៉ែត្រតែប៉ុណ្ណោះ ដូច្នោះសូមឲ្យអាជ្ញាធរខេត្តប៉ៃលិន ពិនិត្យមើលករណីនេះផង ។
លោក ហង្ស សូប៉ារីយា ជំនួយការ ម្ចាស់ផែស្ងួត ឡោ ស៊ុនជាង មានប្រសាសន៍ឲ្យដឹងថា៖ ផែស្ងួតឡោ ស៊ុនជាង ស្ថិតក្នុងភូមិអូររអិល ឃុំស្ទឹងកាច់ ស្រុកសាលាក្រៅ បានចាប់ដំណើរការតាំងពីឆ្នាំ២០១៦ មានរយៈ០៣ឆ្នាំមកហើយ ដោយពីមុនមកពុំមានបញ្ហាអ្វីកើតឡើងទេ ប៉ុន្តែបច្ចុប្បន្នលោកមិនសូវសប្បាយចិត្តប៉ុន្មានទេ ដោយសារតែរថយន្តថៃឆ្លងព្រំដែន មកផែស្ងួតគឺគ្រាន់តែចូល ដើម្បីត្រួតពិនិត្យបន្តិច រួចចេញទៅវិញរហូតដល់រោងចក្រតែម្តង ដែលមានទឹសដៅដល់ខេត្តបាត់ដំបង ហើយការទៅរបស់រថយន្តថៃបណ្តាលឲ្យអសកម្ម ដល់ផែស្ងួតរបស់លោក ,ទី១គឺរថយន្តខ្មែរយើងបង់ពន្ធឆ្នាំ បង់ពន្ធផ្លូវ ប៉ុន្តែមិនបានធ្វើសកម្មភាពឡើយ ,ទី២កម្មកររបស់លោក៥០នាក់ អត់ការងារធ្វើ ហើយចំពោះច្បាប់ទម្លាប់ ដែលរថយន្តថៃ ទៅរហូតដល់ខេត្តបាត់ដំបងនេះលោកមិនដឹងយ៉ាងណាដែរ ។
ចំណែកលោក ឡោ ស៊ុនជាង ម្ចាស់ផែស្ងួតឡោ ស៊ុនជាង មានប្រសាសន៍លើកឡើងអំពីបញ្ហានេះដែរថា៖ ដោយបច្ចុប្បន្នលោកមានបុគ្គលិក និងកម្មករជិត១០០នាក់ ហើយវាជាមោទនភាពបំផុត ដែលរាជរដ្ឋាភិបាល ចេញច្បាប់ឲ្យខេត្តប៉ៃលិនមុនគេ ដោយកន្លងមកយើងធ្វើការយ៉ាងរលូនជាមួយអង្គភាពគយ កាំកុងត្រូល ប៉ុន្តែនៅពេលនេះលោកមិនដឹងថា តើឲ្យរថយន្តថៃចូលមកក្នុងផែហើយគ្រាន់តែត្រួតពិនិត្យ រួចចេញទៅគោលដៅ ចំណែកការអនុញ្ញាតចេញពីថ្នាក់លើណាដែរ ។ លោកបន្តទៀតថា៖ ការអនុញ្ញាតឲ្យរថយន្តថៃចូលរាប់រយៈគឺឡូអញ្ចឹង គឺវាបាត់បង់ផលប្រយោជនពលរដ្ឋខ្មែរយើងយ៉ាងច្រើន ដូចជាសេវាកម្មលើកដាក់ទំនិញ ដោយលោកមានឧបករណ៍អស់ហើយ ប៉ុន្តែអត់មានអ្វីធ្វើព្រោះរថយន្តថៃ ចេញទៅបាត់អស់តែម្តង បើតាមច្បាប់ខេត្តណាដែលមានផែគឺរថយន្តបរទេស ត្រូវយកមកផ្ទេរនៅផែ ដើម្បីឲ្យរថយន្តខ្មែរយើងដឹកបន្តទៅគោលដៅ មិនមែនឲ្យរថយន្តបរទេសដឹកដល់ណាណីនោះទេ ។ជាមួយគ្នានេះលោកក៍សំណូរពរដល់រាជរដ្ឋាភិបាល និងស្ថាប័នពាក់ព័ន្ធ សូមពិនិត្យមើលចំពោះបញ្ហានេះផង ដើម្បីឲ្យយើងមានតម្លាភាពគ្នា ក្នុងការធ្វើពាណិជ្ជកម្ម និងដើម្បីឲ្យពលរដ្ឋក្នុងខេត្តមានការងារធ្វើផង ។
ពាក់ព័ន្ធបញ្ហាខាងលើភ្នាក់ងារព័ត៌មាន មិនអាចសុំការបញ្ជាក់បន្ថែមពីលោក សុខ សាធីម ប្រធានមន្ទីរពាណិជ្ជកម្មខេត្តប៉ៃលិន បានទេ ដោយទូរស័ព្ទមិនចូល ហើយយើងសង្ឃឹមថាលោកនិងធ្វើការបកស្រាយពាក់ព័ន្ធបញ្ហាការធ្វើពាណិជ្ជកម្ម ក្នុងការដឹកជញ្ជូនទំនិញ ចេញចូលនេះដែរ ៕
