រដ្ឋបាលខេត្តកំពតទទួលស្វាគមន៍គណៈប្រតិភូ គណៈកម្មការទី៧ នៃរដ្ឋសភា
(ខេត្តកំពត)៖ នៅព្រឹកថ្ងៃពុធ ៣កើត ខែជេស្ឋ ឆ្នាំកុរ ឯកស័ក ព.ស ២៥៦៣ ត្រូវថ្ងៃទី ០៥ ខែ មិថុនា ឆ្នាំ២០១៩ លោក ជាវ តាយ អភិបាលនៃគណៈអភិបាលខេត្តកំពត ទទួលស្វាគមន៍គណៈប្រតិភូ គណៈកម្មការទី៧ នៃរដ្ឋសភា ដឹកនាំដោយ លោក ហ៊ុន ម៉ានី ប្រធានគណៈកម្មការអប់រំយុវជន និងកីឡា ធម្មការសាសនា វប្បធម៌ ទេសចរណ៍ នៃរដ្ឋសភា។
វត្តមានអញ្ជើញចូលរួមក្នុងពិធីនេះមាន៖ លោក លោកស្រី អភិបាលរងខេត្ត លោក លោកស្រី ជាអនុគណៈកម្ម្មការ សមាជិកគណៈកម្មការ លោក លោកស្រីគណៈប្រតិភូអមដំណេីរ លោក លោកស្រីប្រធានមន្ទីរអង្គភាពជុំវិញខេត្ត នាយក នាយករងរដ្ឋបាលខេត្ត នាយកទីចាត់ការ ប្រធានអង្គភាពចំណុះសាលាខេត្ត សរុបចំនួន ៥០នាក់។
យោងតាមរបាយការណ៍ លោក ជាវ តាយ អភិបាលខេត្តកំពត បានឱ្យដឹងថា ខេត្តកំពត ត្រូវបែងចែកជា៨ ក្រុង ស្រុក មានឃុំចំនួន៨៨ មានសង្កាត់ចំនួន៥ និងភូមិចំនួន៤៨៨ ដែលមានផ្ទៃដីសរុប៤៨៧៣,២០គីឡូម៉ែត្រការ៉េ ក្នុងនោះបែងចែកជាដីបង្កបង្កើនផលចំនួន ១២៦.០០០ហិកតា ផ្ទៃដីស្រែអំបិលចំនួន៣៣៣៣,៦៩ហិកតា ផ្ទៃដីលិចទឹកចំនួន៣០០០ហិកតា ដីភ្នំចំនួន ៥២៩០០ហិកតា មានឆ្នេរសមុទ្រប្រវែង៦៦,៥គីឡូម៉ែត្រ មានព្រំដែនគោកជាប់ជាមួយប្រទេសវៀតណាមប្រវែង៤៣គីឡូម៉ែត្រ។
ខេត្តមានក្រុមហ៊ុនវិនិយោគចំនួន៣៣ក្រុមហ៊ុន ក្នុងនោះក្រុមហ៊ុនឯកជន វិស័យកសិឧស្សាហកម្មចំនួន៤ កំពង់ផែខ្នាតតូចចំនួន៥ ឧស្សាហកម្មចំនួន៩ ទេសចរណ៍សណ្ឋាគារចំនួន៨ ភោជនីយដ្ឋាន១ និងតំបន់សេដ្ឋកិច្ចពិសេសចំនួន២ ផលិតកែច្នៃផលសមុទ្រចំនួន១។ជាមួយគ្នានេះនៅចុងឆ្នាំ២០១៩នេះ ខេត្តកំពតនឹងត្រូវរៀបចំបុណ្យសមុទ្រលើកទី៨ ជុំទី២ ព្រមទាំងពិធីបុណ្យជាតិធំៗមួយចំនួនទៀតតាមការចាត់តាំងពីសំណាក់រាជរដ្ឋាភិបាលកម្ពុជា។
ឆ្លើយតបនឹងកិច្ចការនេះរដ្ឋបាលខេត្ត បានដាក់ចេញផែនការសកម្មភាពសំខាន់ៗជាអទិភាពសម្រាប់ត្រៀមលក្ខណ:រៀបចំបុណ្យទាំងនេះឱ្យបានល្អប្រសើរ និងទទួលបានភ្ញៀវទេសចរណ៍ច្រើនជាងមុន រួមទាំងមានការបំពាក់ភ្លើងបំភ្លឺផ្លូវតាមទីសាធារណ: ព្រមទាំងការតុបតែងកែលម្អសួនច្បារ ដាំដើមឈើ ជួសជុលនិងស្ថាបនាផ្លូវក្នុងក្រុង កែលម្អសោភ័ណភាពតាមមាត់ព្រែកកំពត និងរៀបចំឆ្នេរសមុទ្រ នៅឃុំបឹងទូក ស្រុកទឹកឈូ។
ក្នុងកិច្ចសំណេះសំណាល លោក ហ៊ុន ម៉ានី បានគូសបញ្ជាក់ថា ដោយអនុលោមអ្វីដែលជាការងាររបស់យើង លោកសូមបញ្ជាក់ថា ក្នុងការងារបោះឆ្នោតកន្លងមកប្រជាពលរដ្ឋមិនបានងាកមើលពីអតីតកាលនោះទេ ដោយប្រជាពលរដ្ឋបានសម្លឹងឆ្ពោះទៅមុខ ហើយពួកគាត់កំពុងគិតថាតើទៅថ្ងៃមុខគណបក្សប្រជាជនកម្ពុជាដែលគាត់បានគាំទ្រយ៉ាងពេញទំហឹងនោះនឹងអភិវឌ្ឍអ្វីបន្ថែមទៀត។
ផ្អែកទៅលើមូលដ្ឋាននេះ នីតិប្បញ្ញតិ្ត នៃរដ្ឋសភារបស់យើង និងការចូលរួមនៃការអំពាវនាវរបស់សម្តេចប្រធានគណបក្ស និងការបំពេញការងារទ្វេរដងជូនទៅដល់ប្រជាពលរដ្ឋ។លោកថា ក្នុងនាមជាតំណាងរាស្ត្រ លោកមានតួនាទីបី ទី១ គឺជាអ្នកផ្តួចផ្តើមតាក់តែងសេចក្តីស្នើច្បាប់ សេចក្តីស្នើវិសោធនកម្មច្បាប់ និងអនុម័តច្បាប់ ,ទី២ ជាអ្នកជំរុញនិងតាមដានការអនុវត្តច្បាប់,និងទី៣ គឺការចុះមូលដ្ឋានស្វែងយល់សាកសួរសុខទុក្ខប្រជាពលរដ្ឋតាមមូលដ្ឋាន តាមមណ្ឌល ពាំនាំនូវទុក្ខកង្វល់និងការលំបាកផ្សេងៗរបស់បងប្អញនប្រជាពលរដ្ឋ ដើម្បីរាយការណ៍ជូនរាជរដ្ឋាភិបាល ពិនិត្យនិងចាត់វិធានការដោះស្រាយ៕
